Gwamna Abba Kabir Yusuf ya kaddamar da shirin inshorar lafiya kyauta na ‘Abba Care Initiative’ da zummar inganta harkokin kiwon lafiya ga marasa galihu a Kano.
Marasa galihu sama da dubu 300 ne aka yi wa rajista a karkashin shirin, wadanda suka hada da mata masu juna biyu, da tsofaffi, da masu lalurar nakasa, da fursunoni da masu fama da cutar sikila.
Hukumar ba da tallafi na rashin lafiya ta jihar Kano (KCHMA) ce ke gudanar da shirin, inda take kula da kiwon lafiya kyauta a dukkan wuraren da aka keɓe a jihar.
Gwamna Yusuf ya jaddada cewa samun kiwon lafiya wani muhimmin hakki ne ga dukkan ‘yan kasa, inda ya yi alkawarin ci gaba da aiwatar da manufofin da suka ba da fifiko ga walwala da jin dadin al’ummar jihar.
“Wannan ci gaban wani muhimmin mataki ne na samar da tsarin kiwon lafiya ga al’ummar Kano, da nufin daukaka rayuwar dubban jama’a tare da samar da ingantacciyar al’umma.”
Shirin na ‘Abba Care Initiative’ ya nuni da yadda Gwamna Yusuf ya himmatu wajen kyautata rayuwar al’ummar jihar, tare da tabbatar da cewa ba a bar kowa a baya ba,wajen samun ingantaccen kiwon lafiya.
Mai rahoto;
M.B.Gama.
At-tajdid News.
