Gwamnan jihar Borno, Farfesa Babagana Umara Zulum ya yi kira da a yi cikakken nazari kan tsarin ilimi na Najeriya don daidaita alaka tsakanin cibiyoyin ilimi da muradun fasahar zamani, kere-kere da cigaban kasa.
Gwamnan ya yi wannan furucin ne a yayin wata ziyarar ban girma da Manajan Darakta kuma Babban Jami’in Hukumar Kula da Lamuni ta Ilimi ta Najeriya (NElfund) Mista Akintunde Sawyerr ya kai a fadar gwamnati, Maiduguri.
Gwamna Zulum ya bayyana damuwarsa cewa yawancin daliban da suka kammala karatun digiri da manyan cibiyoyi ilimi suka yaye ba su da kwarewar da suka dace don kyankasa sabbin dabarun kere’kere da abubuwa da ci gaban fasaha.
Ya bukaci gidauniyar Nelfund da ta yi nazari sosai kan batun tare da aiwatar da hanyoyin da za su baiwa masu digiri damar zama masu dogaro da kansu maimakon jiran aikin gwamnati.
“Muna da manyan matsaloli guda biyu a tsarin iliminmu: rashin daidaito tsakanin cibiyoyin ilimi da masana’antu, saboda ba sa sadarwa yadda ya kamata, da rashin daidaito tsakanin kasuwar kwadago da wadanda suka kammala karatun digiri, wadanda da yawa daga cikinsu ba su da shiri don yin aiki a masana’antu,” in ji Zulum.
Zulum ya bukaci Nelfund da ta tallafawa tsarin ilimin kasuwanci, fasaha, da sana’oin hannu.
Ya kara da cewa, “Bayan bayar da lamuni, ina roƙon ku da ku bincika hanyoyin da za ku tallafa wa ilimin kasuwanci da haɓaka horar da fasaha da sana’o’i don rage ƙin yarda da waɗannan mahimman fannonin karatu,” in ji shi.
Gwamnan ya yaba wa shugaba Bola Tinubu bisa kafa Nelfund, yana mai jaddada cewa samar da gidauniyar zai rage jahilci da karacin ilimi a musamman a yankin Arewa maso Gabas.
Ya yi alkawarin zaburar da shugabannin kananan hukumomi da sarakunan gargajiya don wayar da kan jama’a game da shirin, inda ya yi nuni da muhimmancinsa ga daliban da ba su da galihu da ke son neman ilimi.
“Na tattauna da shugabannin manyan makarantu tun lokacin da kuka hau kan karagar mulki, kuma rahotanni sun nuna cewa yawancin daliban da suka nemi lamunin Nelfund sun karbe su cikin sauki,” in ji Zulum.
Manajan Darakta kuma Babban Jami’in Asusun Lamuni na Ilimi na Najeriya (NElfund), Mista Akintunde Sawyerr, ya bayyana manufar asusun na magance matsalar karuwar daliban da suka kasa cigaba da karatu saboda matsalar kudi.
Ya lura cewa lamunin ba shi da kudin ruwa, tare da biyan kuɗi a kashi 10% na abin da mai karɓa ya samu bayan samun aikin yi.
Mista Sawyerr ya samu rakiyar mataimakin shugaban jami’ar jihar Borno, Farfesa Babagana Gutti, da wakilan kungiyar daliban Najeriya ta kasa (NANS).
Dauda Iliya
Mai Baiwa Gwamnan Jihar Borno Shawara
(Harkokin Yada Labarai kuma Mai Magana da Yawun sa)
Mai rahoto;
Abdullahi Mustapha.
At-tajdid News.
