Wata bincike ta hadin gwiwa da kafafen labarai na The Guardian, +972 Magazine, da Local Call ya bankado cewa kamfanin Microsoft ya kirkiro wata sabuwar fasahar girgije ta musamman (custom Azure cloud) domin sashen leken asirin sojan Isra’ila — wato Unit 8200.
Binciken ya bayyana cewa tun daga shekarar 2022, wannan tsarin ya bai wa rundunar damar adana babbar tirin bayanan kiran waya na ‘yan Falasɗinu, ciki har da miliyoyin rikodin kiran waya na yau da kullum.
A cewar rahoton, ana zargin an yi amfani da wannan bayanan ne wajen tsara hare-haren soja da kuma ayyukan bincike a Gaza da West Bank.
Kamfanin Microsoft ya bayyana cewa Shugaba Satya Nadella bai san da hakikanin nau’in bayanan da za a adana ba a tsarin Azure. Sai dai wasu takardu da aka bankado daga ciki, da kuma hirarraki da tsofaffin ma’aikata 11 daga Microsoft da hukumar sojin Isra’ila, sun nuna cewar akwai cikakken fahimta dangane da yadda tsarin zai taimaka wajen tattara bayanan fararen hula.
Duk da cewa Microsoft na musanta cewa an yi amfani da fasahar wajen cin zarafin jama’a, rahoton ya nuna alamun cewa kamfanin na da masaniya game da girman tsarin da kuma amfani da shi.
M.B.S. Gama
At-tajdid News
