Cutar Lassa Fever Ta Hallaka Mutane 138 a Najeriya a Shekarar 2025
Hukumar Dakile Cututtuka Masu Yaduwa ta Najeriya (NCDC) ta bayyana cewa, daga farkon shekarar 2025 zuwa yau, cutar Lassa fever ta hallaka mutane 138 a fadin kasar. Wannan adadi yana cikin rahoton da aka fitar a ranar Juma’a, 16 ga Mayu, 2025.
Yadda Cutar Ke Yaduwa:
An tabbatar da 717 mutane da suka kamu da cutar a jihohi 18, inda jihohin Ondo, Bauchi da Taraba suka fi fuskantar yaduwar cutar sun dauki sama da kashi 71% na duka wadanda suka kamu.
Yawan Mutuwar da Aka Rubuta:
A halin yanzu, adadin mutuwar da ke biyo bayan cutar ya kai kashi 19.3%, wanda ya fi na shekarar 2024 inda ya tsaya a kashi 18.0% a lokaci iri ɗaya.
Rukunin Shekaru da Cutar Ta Fi Kama:
Mafi yawancin wadanda cutar ta fi kamari suna tsakanin shekaru 21 zuwa 30, kuma maza suna da yawan kamuwa fiye da mata.
Matakan da Gwamnati Ke Dauka:
NCDC ta tura kungiyoyin gaggawa guda 10 zuwa jihohin da aka fi samun barkewar cutar, tare da kunna tsarin kulawa na gaggawa da ya hada da hukumomi da dama. Amma akwai kalubale kamar rashin kaiwa asibiti da wuri, tsadar magani, da kuma rashin isasshen wayar da kan jama’a, musamman a yankunan karkara.
Yadda Cutar Ke Yaduwa:
Cutar Lassa na yaduwa ne ta hanyar:
Abinci ko kayan gida da beraye suka bata da fitsari ko bayan gida
Saduwa da jinin ko majinar wanda ya kamu da cutar, musamman a asibitoci da ba su da kayan kariya masu kyau
Shawarwari Ga Jama’a:
A guji cin abinci mara tsafta
A kare abinci da kayan gida daga beraye
A garzaya asibiti da wuri idan aka samu alamomin zazzabi mai tsanani
Hamza Muhammad Sharif dauke da rahoto
