Ministan tsaro kuma tsohon gwamnan jihar Jigawa, Alh. Mohammed Badaru ya bayar da tallafin naira miliyan 20 ga wadanda ambaliyar ruwa ta shafa a jihar Jigawa.
Badaru ya bayar da tallafin ne lokacin da ya ziyarci gwamnan jihar, Umar Namadi, inda ya jajantawa gwamnatin jihar da iyalan da suka rasa ‘yan uwansu a iftila’in.A cewar ministan, iftila’in ya shafi garuruwa 148 a kananan hukumomi 14, kimanin mutane 50,000 da gidaje sama da 11,500.
Ministan Tsaron ya ce tallafin na kashin kansa ne ga wadanda abin ya shafa domin rage musu radadin da suke ciki.Ya bukaci gwamnan jihar da wadanda ambaliyar ruwa ta shafa da su dauki iftila’in a matsayin wata jarrabawa daga Allah Madaukakin Sarki tare da mika komai a gare shi.
A nasa bangaren, Gwamna Namadi ya godewa ministan bisa wannan ziyarar da ya kai masa.
At-tajdid News.
